लोकसंवाद संवाददाता | समाचार | बैशाख ०२, २०७६
भारतको काश्मिर राज्यबारे यस्तो भनाई प्रचलित छ, ‘धरतीमा काहीँ स्वर्ग छ भने यहीँ छ । ’
मुगल बादशाह जहाँगीरले आफ्नो प्रेयसी नूरजहाँका लागि यहाँ थुप्रै बगैंचा बनाएका थिए । फारसीमा उनले भनेका थिए –
गर फिरदौस बरु रुए जमीं अस्त, हमीं अस्त हमीं अस्त हमीं अस्त ।
पृथ्वीमा काहीँ स्वर्ग छ भने, त्यो यहीँ छ, यहीँ छ ।
काठमाडौं । युवापुस्तालाई काश्मिरबारे थाहा हुने माध्यम नै अहिले आंतकबाद बनेको छ । काश्मिरमा भएको आतंकबादी घटनामा यतिजना मारिए... ।
दुःखद पृथ्वीको यो स्वर्ग अहिले भारत र पाकिस्तानको समरभूमि बनेको छ ।
श्रीनगर मनोहर बगैंचा, सुन्दर ताल बाह्रै महिना फुल्ने विविध रंगीचंगी
फूल, स्याउ, ओखर, बदाम, केशर, कहवा र बहुमूल्य गलैंचाको पनि राजधानी हो ।
श्रीनगरमा रहेको टयूलिप गार्डेन एशियाकै सबैभन्दा ठूलो ट्यूलिप गार्डेन हो । गत साता यो गार्डेन पर्यटकका लागि खोलिएसँगै काश्मिरमा पर्यटक सिजनको शुभारम्भ भयो ।
संसारभरका पर्यटक ट्यूलिप गार्डेन हेर्न काश्मिर पुग्ने गर्छन । एक साता भित्र नै ७० हजारभन्दा बढी पर्यटकले गार्डेन भ्रमण गरेका छन ।
यस पटक ट्यूलिप गार्डेनमा विभिन्न प्रकारका १२ वटा ट्यूलिप रोपिएका छन ।
सामान्यतया ट्यूलिपको विरुवाको आयु ३ देखि ४ वर्षको हुने गर्छ । बेग्लाबेग्लै रंगका ट्यूलिप फुलेको दृश्यले पर्यटकलाई आनन्द अनुभूति गराउँछन ।
डल लेकको किनारमा रहेको जबरवान पर्वत श्रृंखलाको बीचमा बनाइएको यो ट्यूलिप गार्डेन ९० एकड क्षेत्रमा फैलिएको छ ।
ट्यूलिप बगैंचाले श्रीनगरमा आउने पर्यटकको संख्यामा वृद्धि भएको छ ।
रातो, गुलाफी, पहेंलो, बैंजनी, नीलो, सेतो आदि रंगमा फुलेंको ट्यूलिपले पुरै क्षेत्रलाई विभिन्न रंगमा रंग्याइदिए जस्तो भान हुन्छ ।
श्रीनगर नजिकै रहेको बदाममाडी क्षेत्रमा अहिले बदामका रुख पनि लटरम्म फुलेका छन । धेरै पर्यटक बदाममाडीसम्म पुग्ने गर्छन ।
बदामको रुखमा पनि विभिन्न रंगका फूल आउने गर्छन । काश्मिरघाटीमा सर्रस्युँ खेती पनि हुन्छ । अहिले काश्मिरमा सर्रस्युँ पनि फुलेको बेला हो ।
