लोकसंवाद संवाददाता | समाचार | बैशाख ०५, २०७६
काठमाडौँ । ‘राइड सेयरिङ’ सेवा दिने कम्पनी टुटलले ३ करोड ४० लाख कर तिर्नुपर्ने भएको छ । आन्तरिक राजस्व कार्यालय ललितपुरले करिब तीन महिना फाइल अध्ययन गरी कर छलीको निष्कर्ष निकाल्दै कम्पनीमाथि कर निर्धारण गरेको हो । यो रकम जरिवाना र ब्याजसहितको हो ।
‘तीन आर्थिक वर्षको मूल्य अभिवृद्धि कर (भ्याट), संस्थागत आयकर र राइडरलाई दिने रकमको अग्रिम करकट्टी शीर्षकमा कर निर्धारण गरिएको हो’, राजस्व स्रोतले भन्यो, ‘सबै भन्दा बढी भ्याट शीर्षकमा कर निर्धारण भएको छ।’
दोस्रो बढी कर राइडरलाई भुक्तानी रकमको अग्रिम करकट्टीको १५ प्रतिशत हो। ‘उसका लागि निर्धारण गरिएको संस्थागत आएकर भने थोरै छ,’ स्रोतले भन्यो। कुन शीर्षकमा कति कर निर्धारण गरिएको हो भन्ने बारे कर अधिकृतहरुले औपचारिक प्रतिक्रिया दिन चाहेनन् । यो समाचार आजको कानितपुर दैनिकमा प्रकाशित छ ।