लोकसंवाद संवाददाता | समाचार | बैशाख ०३, २०७८
काठमाडौँ । विश्वशान्ति तथा अध्यात्म विज्ञान समाज अष्ट्रेलियाले विश्वभरका अन्तर्राष्ट्रिय मान्यता प्राप्त एक हजार ८०० योग शिक्षकलाई जुममार्फत एकसाथ दीक्षित गरेको छ ।
राष्ट्रिय–अन्तर्राष्ट्रिय शैक्षिक तथा यौंगिक सङ्घ संस्थाको समन्वयमा अन्तर्राष्ट्रिय योग एलायन्सद्वारा मान्यता प्राप्त योग शिक्षकलाई जुममार्फत दीक्षित गरिएको हो । समाजका संस्थापक प्रा। योगी आचार्य राजन शर्माको समन्वय र नेपालका योगीको सहकार्यमा कार्यक्रम भएको हो । कार्यक्रममा ३२ राष्ट्रका योग मुमुक्षु साधक र गुरुजनको उपस्थिति थियो । कार्यक्रममा नेपाल प्रज्ञा प्रतिष्ठानका कुलपति गङ्गाप्रसाद उप्रेतीले देशको पहिचान जोगाउंन गरिएको कार्य महान र राज्यकै उत्थान गर्ने अभियान रहेको बताउनुभयो ।
अष्ट्रेलियाका लागि नेपाली राजदूत महेशराज दाहालले अभियानले देशकै गौरव बढाएको सुनाउनुहुँदै आचार्य राजन शर्माको अभियान अब विश्वकै नेपालीको अभियान भएको बताउनुभयो । डा योगी विकासानन्दले विदेशी योग एलायन्सको नाममा एकाधिकार चलाउँदै आएको नेपाली समाजमा निःशुल्क वैश्विक मान्यता प्राप्त शिक्षा घर–घरमा पुर्याएर समाजले सत्पात्र र सच्चा सपुतको काम गरेको बताउनुभयो ।
अध्यात्मिक युवा गुरु चैतन्य कृष्णले समाजको योगदानबाट विश्वमै एक अलौकिक काम हुन लागेको बताउनुभयो । डा क्षितिज बाराकोटीले योगले जोड्ने कार्य गर्ने भएकाले यो अभियानले वास्तवमै विश्व जोडेको बताउनुभयो । योग सिकाइ चेतना प्रधान हुनुपर्ने उहाँको भनाइ थियो ।
अमेरिका, अष्ट्रेलिया, फिजी, मलेसिया, कतार, क्यानडा, कोरिया, भारतलगायत विश्वका विभिन्न देश तथा नेपालका सातै प्रदेशका सङ्घसंस्था, योगीजन, गुरुकुल र प्रत्येक योग शिविर तथा घर–घरबाट एकैसाथ विश्व शान्ति दीप प्रज्ज्वलन गरेर सांकेतिक रुपमा सहभागीता जनाउनुभएको थियो ।