न्युज कारखाना | समाचार | भदौ १७, २०७८
आसन्न १४औँ महाधिवेशनमा महामन्त्री पदमा उम्मेदवारी घोषणा गरेका नेपाली कांग्रेसका युवा नेता गगन थापा रामचन्द्र पौडेल खेमामा खुलेका छन् । बिहीबार पार्टी केन्द्रीय कार्यालय सानेपामा पौडेल खेमाले आयोजना गरेको पत्रकार सम्मेलनमा थापा मंचमा देखिएका थिए ।
१३औँ महाधिवेशनमा कृष्णप्रसाद सिटौला खेमाबाट महामन्त्रीमा उम्मेदवारी दिएका थापा सो समूह छाडेर पौडेल समूहमा प्रवेश गरेका हुन् ।
गत महाधिवेशनमा उनी डा. शशांक कोइराला र अर्जुननरसिंह केसीसँगै महामन्त्रीमा उठेका थिए । केसी शेरबहादुर देउवा खेमाबाट महामन्त्रीमा उठेका थिए । केसी पनि अहिले पौडेल खेमामै छन् । आफूलाई महामन्त्रीमा उम्मेदवार बनाए पनि देउवाले कोइरालासँग साँठगाँठ गरेर आफूलाई महामन्त्रीमा हराएको भन्दै केसीले देउवाको साथ छाडेका हुन् । अब पौडेल खेमामा केसी, थापा र कोइराला सँगै भएका छन् ।