न्युज कारखाना | समाचार | मंसिर ०३, २०७८
दार्चुलाको ब्यास गाउँपालिका- १ मा रहेका गाउँहरू छाङरु र तिंकरमा जनगणनाका लागि भारतले बाटो प्रयोग गर्न नदिएपछि जनगणना कार्यालय दार्चुलाको टोली नेपालकै बाटो भएर शुक्रबार उक्त स्थानतर्फ गएको छ ।
भारतीय बाटो प्रयोग गर्नका लागि भारतको पिथौरागढ जिल्लाको धार्चुला तहशिलसँग गत २६ कात्तिकमा नै अनुमति मागेको भए पनि हालसम्म अनुमति नदिएपछि स्वदेशकै बाटो भएर टोली उक्त क्षेत्रतर्फ गएको जनगणना कार्यालय दार्चुलाका प्रमुख पदमराज पाण्डेले जानकारी दिए ।
जनगणना कार्यालय दार्चुलाका सहायक जनगणना अधिकारी र कार्यालय सहयोगी लोकेन्द्र टेर उक्त क्षेत्रमा जनगणनाका लागि गएका छन् । गणकले जान नसक्ने भनेपछि आफूहरू मात्र गएको सहायक जनगणना अधिकारी कार्कीले बताए ।
‘जनणनाका लागि गएका छौँ । आज बेलुका ब्यास गाउँपालिका- २ दुम्लिङमा बास बस्ने र भोलि उक्त क्षेत्रतर्फ जाने योजनामा छौँ', कार्कीले भने ।
दुम्लिङभन्दा माथिल्लो क्षेत्रमा बाटो अवरुद्ध भएकाले जान सक्ने अवस्था भए जाने नभए फिर्ता हुने उनको भनाइ छ । ‘महाकाली नदी किनारको मूलबाटो पूर्ण रूपमा भत्किएको छ रे, डाँडा चढेर जान सकिने भए जान्छाैँ, नसकिने अवस्था भए फिर्ता हुन्छौँ’, उनले भने ।
जान सक्ने नभएमा सुपरिवेक्षकले ल्याएको फोन नम्बरमा सम्पर्क गरी यतैबाट सोधपुछ गरी जनगणना गरिने जनगणना कार्यालय दार्चुलाका प्रमुख पाण्डेको भनाइ छ । छाङरु गाउँमा ८१ र तिंकर गाउँमा ३२ गरी त्यस क्षेत्रमा ११३ परिवार रहेको उनले बताए ।
ब्यास गाउँपालिका- १ मा पर्ने ५ वटा गाउँहरू कुटी, नाभी, गुञ्जी, तिंकर र छाङरु गाउँमध्ये कुटी, नाभी र गुञ्जीगाउँ भारतले अतिक्रमण गरेको छ । भारतले अतिक्रमण गरेका बाहेक तिंकर र छाङरु गाउँमा नेपालको प्रशासनिक अधिकार कायम छ ।
छाङरु पुग्ने नेपालको बाटो वर्षातको बेला महाकाली नदीको कटानले तथा भारतले विस्तार गरिरहेको धार्चुला-लिपुलेक सडकका कारण ठाउँठाउँमा अवरुद्ध छ ।नेपालतर्फ बाटो नभएकाले स्थानीयदेखि त्यस क्षेत्रमा पुग्ने नेपाली सुरक्षाकर्मीहरू समेत भारतको अनुमित लिएर जाने गरेका छन् ।
अनुमति दिएमा अतिक्रमित गाउँको जनगणना हुने आशंका
प्रशासनले गणकको लागि यात्रा अनुमति मागेको विषयमा उच्च स्तरलाई जानकारी गराएको भारतको पिथौरागढ जिल्लाका जिल्ला अधिकारी डा. आशिष चौहानले भारतीय पत्रिका 'अमर उजाला'लाई प्रतिक्रिया दिएका छन् ।
नेपालतर्फ गुञ्जी, कुटी र नाभीको पनि जनगणना गर्ने चर्चा भएकाले गणकलाई यात्राको अनुमति दिएमा उक्त क्षेत्रसम्म पुग्न सक्ने भारतले आशंका गरेको छ ।
भारतको धार्चुला तहशिलबाट करिब ७० किलोमिटर उत्तरमा रहेको छियालेक क्षेत्रबाट भारतले नोटिफाइड क्षेत्र घोषणा गरको छ । नोटिफाइड क्षेत्रमा विदेशी नागरिकले प्रवेश गर्नका लागि भारतीय प्रशासनको अनुमति आवश्यक हुन्छ ।
छियालेकभन्दा माथिल्लो क्षेत्र प्रवेश गर्नेलाई भारत तिब्बत प्रहरी (आईटीवीपी)ले यात्रा अनुमति जाँचदेखि कडा जाँच गर्ने गरेको छ ।
भारतको छियालेकबाट करिब ५ किलोमिटर अघि नेपालीगाउँ छाङरु जाने महाकाली नदीमाथी काठको पुल छ । उक्त नाकालाई सीतापुल भनिन्छ । छियालेक क्षेत्रमा यात्रा अनुमतिपत्र देखाएर भारतको गरब्याङ गाउँ पुगेकाहरूले पुनः सीता पुलनाकामा रहेको एसएसबीले अनुमतिपत्रलगायत जाँच गरी नेपाल प्रवेश दिन्छ ।
गत २५ कात्तिकबाट सुरु भएको १२औँ राष्ट्रिय जनगणना ९ मंसिरमा समापन हुँदै छ ।