लोकसंवाद संवाददाता | समाचार | कात्तिक ०६, २०७९
मकवानपुर । नेकपा (एकीकृत समाजवादी)का स्थायी कमिटी सदस्य एवम् पूर्वमन्त्री विरोध खतिवडाले निर्वाचन विशेष कार्यकर्ता भेटघाटलाई तीव्रता दिनु भएको छ । भेलामा खतिवडाको निशानामा उहाँकै पुरानो पार्टी नेकपा एमाले पर्ने गरेको छ ।
खासगरी निर्वाचन क्षेत्र नम्बर १ मा कमल थापालाई सूर्य चिन्ह दिएर एमालेले उम्मेदवार बनाएपछि र पाँच वर्षअघि आफ्नै निर्वाचन अभियानमा हिँडाएर गाउँघर चिनाएका व्यक्तिले अहिले ‘टुरिस्ट उम्मेदवार’ भनेर कटाक्ष गरेपछि खतिवडाले मनहरी, राक्सिराङ, कैलाश, मकवानपुरगढी, भीमफेदीमा भएका कार्यक्रमहरुमा एमालेमाथि पेचिलो प्रहार गरेर चर्चा बटुल्नु भएको छ । तिहार अघि ६२ वडा रहेको निर्वाचन क्षेत्रमा प्रदेश (क) का उम्मेदवार कुमारी मोक्तान (माओवादी) र प्रदेश (ख) का उम्मेदवार ईन्द्रबहादुर बानियाँ (कांग्रेस)सहित पुग्ने योजना अन्तर्गत खतिवडा थाहा, ईन्द्रसरोवर, हेटौँडामा पनि पुग्दै हुनुहुन्छ ।
त्यहाँ पनि एमाले अध्यक्ष केपी ओली, राप्रपा नेपालका नेता कमल थापा, मकवानपुरमा एमालेका नेताहरु डोरमणि पौडेल, रामेश्वर रानामाथि नै खतिवडाको प्रहार हुने लोकतान्त्रिक वाम गठबन्धनका नेता कार्यकर्ताहरु बताउँछन् ।
भीमफेदी र मनहरीमा भएको कार्यक्रममा खतिवडाले नयाँ कुरा गर्नु भएको छ । उहाँले भन्नुभएको छ, ‘एमालेसँग ग्रह बलियो भएको पात्र मै थिएँ, म भइन्जेल एमाले जितिरह्यो, अहिले ओलीले लेखेटेर म गठबन्धनमा पुगेको छु, अब एमाले मकवानपुरबाट पत्तासाफ हुन्छ, खतिवडा चैँ आफ्ना अरु पाँच गठबन्धन सहकर्मीसहित जित्छ ।’ हुन पनि हो, २०४८ सालदेखि अविजित खतिवडालाई १८ वर्ष संसद बाहिर राख्ने काम एमालेले गर्यो । उहाँले टिकट नपाउँदा एमाले हार्ने, पाउँदा जित्ने संयोगलाई खतिवडाले ‘बलियो ग्रह’ भन्ने गर्नु भएको छ ।
खतिवडाको यो तर्कलाई नेपाली कांग्रेस मकवानपुर २ (ख) का उम्मेदवार ईन्द्र बानियाँले पनि पुष्टि गर्दै साथ दिइरहनु भएको छ । प्रदेश ख मा ३० हजार मत गठबन्धनको छ, एमाले कमजोर छ भन्नु भएको छ । खतिवडा भन्नुहुन्छ, ‘एमाले यसपटक ३० हजारको हाराहारीमा भोट ल्याउने अवस्थामा छ, उसको भोट लगातार घट्दो छ, किनभने उसँग यतिखेर विरोध खतिवडा छैन ।’
२०७४ को निर्वाचनमा नेकपा एमालेका उम्मेदवार खतिवडाले ४६ हजार ४ सय ८१ मत ल्याउनु भएको थियो । १८ वर्षपछि उहाँ फेरि संसद छिर्नु भएको थियो । र, उहाँका प्रतिद्वन्द्वी नेपाली कांग्रेसकी महालक्ष्मी डिना उपाध्यायले ३४ हजार ९० मत ल्याउनु भएको थियो । अर्थात् एमालेले १२ हजार भन्दा बढी मत ल्याएको थियो खतिवडालाई उम्मेदवार बनाउँदा ।
२०७९ वैशाख ३१ गते भएको स्थानीय तह निर्वाचनमा एमालेको झण्डै ६ हजार हजार भोट हरायो । स्थानीय तहको निर्वाचनअनुसार निर्वाचन क्षेत्र नम्बर २ मा एमालेको ३६ हजार मत देखियो, कांग्रेसको ३४ हजार, माओवादीले २२ हजार मत ल्यायो भने एमाले विभाजनबाट बनेको समाजवादीले ४ हजार मत ल्यायो । कांग्रेसको मत यथावत्, माओवादीको वृद्धि हुँदा एमालेको पनि ६ हजार भन्दा बढी भोट हरायो । समाजवादीमा पनि जम्मा ४ हजार देखिएको हो, ४६ हजारबाट ३६ हजारमा झर्दा ४ हजार समाजवादीमा गए पनि ६ हजार भोट हरायो ।
यसपटक खतिवडा भन्नुहुन्छ, ‘एमालेको उल्का आए ३५ हजार नत्र ३० हजारमा झर्छ ।’ यसो हुँदा गठबन्धनको भोट ६० हजार भन्दा बढी हुने तर्क त छँदैछ, खतिवडा एमालेको धेरै भोट घटाउने पनि भन्नुहुन्न । उहाँ भन्नुहुन्छ, ‘४ हजार मतको उम्मेदवार संघमा उठेको छ भन्नुहुन्छ, गठबन्धनको भोट कायमै छ, यसपटक ६ हजार जति भोट थपेर समाजवादीको १० हजार देखाउने मेरो प्रतिवद्धता भयो, १० हजार भोट पुर्याएरै छाड्छु ।’
खतिवडाको तर्क सुन्ने हो भने एमालेको अरु ६ हजार भोट घट्नेवाला छ र त्यो भोट समाजवादीमा खस्ने वाला छ । त्यसो हुँदा एमालेको भोट ४६ हजारबाट घटेर ३६ हजारमा त पुगिसकेको छ, खतिवडा त्यसलाई घटाएर ३० हजार पुर्याउने गरी एमालेलाई समाजवादीमा आकर्षित गराउन लाग्नु भएको छ । खतिवडासँगै स्पर्धा गरिरहेकी र यसपटक गठबन्धनबाट मकवानपुर १ मा उम्मेदवार हुनु भएकी नेपाली कांग्रेस सहमहामन्त्री महालक्ष्मी डिना उपाध्याय भन्नुहुन्छ, ‘त्यो क्षेत्रमा विरोधजीको केही भोट पकेटकै रुपमा छ, उहाँ जता जानुहुन्छ, त्यतै भोट हाल्ने जनमत उहाँले बनाउनु भएको छ, यसपटक पनि अरु पार्टीमा रहे पनि भोट भने उहाँको पकडमा हुन्छ भन्ने घटनाको म नजिकको भुक्त भोगी हुँ ।’
यसपटक एमालेले आफ्नो लगातारको ओरालो यात्रा रोक्न निकै कष्टका साथ मेहनत गरिरहेको छ । तर २४ हजार भन्दा बढी मत रहेको गठबन्धनसँगै कमल थापाको आगमनले पनि कार्यकर्ता रुष्ट छन् । जित्ने होइन भन्ने मनोग्रन्थिले कतै मकवानपुर–२ मा एमालेको अरु १० हजार मत त हराउने होइन ? मकवानपुर–२ मा १ लाख ५० हजार ५ सय ७८ मतदाता छन् ।