लोकसंवाद संवाददाता | समाचार | पुस ०९, २०७९
पहिचान पुरस्कार कोषले २०७८/ २०७९ को पहिचान पुरस्कार अर्जुन बाबु माबोहाङ र अमित थेवे मिहाङद्धारा सङ्कलित ‘सिरिजंगा, फाल्गुनन्द र ईमानसिंह चेम्जोङका लेखोट’ र कविता राईको ‘गुरु’ उपन्यासलाई संयुक्त रुपमा पुरस्कार प्रदान गर्ने निर्णय गरेको छ ।
लालीगुराँस नगरपालिकाको नगर प्रमुख समेत रहेका अर्जुन बाबु माबोहाङ लिम्बु जातीको विषयमा खोज अनुसन्धान गर्छन् । विषेश गरी मुन्धुमको जिवन दर्शनलाई नजिकबाट अध्ययन गर्छन् । उनी मुन्धुम दर्शनको अध्येता हुन् । अमित थेवे मिहाङ हाल रोजगारीको लागि वेलायतमा रहेका छन् । उनी युवा कवि हुन । पत्रकार हुन् ।
सामाजिक अभियान्ता हुन् । उहाँहरुको संकलन र लेखनमा प्रकाशित भएको पुस्तक हो, ‘सिरिजंगा, फाल्गुनन्द र ईमानसिंह चेम्जोङका लेखोट’ । यो महत्वपूर्ण दस्तावेज हो । जसलाई उनीहरुले आम समाजमा उपस्थित गराएका छन् । आफ्नो मातृभाषालाई आफ्नै लिपिमा लेखिनु उ बेला सामान्य विषय थिएन । मातृभाषा र लिपिको संरक्षण गरिएको ऐतिहासिक दस्तावेज पनि हो । धरानको विजपुरमा क–कस्ले राज्य गर्यो र सेनबंसीहरुको उदय कसरी भयो भन्ने विषय यस पुस्तकमा आएको छ ।
कविता राई शिक्षक हुन् । काठमाण्डौं भन्दा धेरै टाढा भोजपुरको एक स्कूलमा पढाउँछिन् । साथै कविता र आख्यान लेख्छिन् । गुरु उपन्यास सरल गाउँले जन जिव्रोमा जोडिएको भाषा शैलीमा लेखिएको छ । विशेष गरी जनयुद्धको विषयलाई वादी र प्रतिवादी नभई लेखिएको छ । पुर्वी पहाडदेखि पश्चिम लमजुङको दुरा डाँडासम्मको कथा र कथाका पात्रहरु जोडिएका छन् ।
संस्थाले जनाए अनुसार, चैत्र ४ गते भोजपुरको चखिया डाँडामा पुरस्कार वितरण गरिने छ । गतसाल पनि चखियामा चैत्र ४ गते नै पुरस्कार प्रदान गरिएको थियो । चैत्र ५ गते एक दिने ‘काब्य मुन्दुम पथ यात्र’ गर्ने तालीका तय गरेको छ । उक्त यात्राको आउनु हुने पाहुनाहरुलाई खान र बस्नको लागि निशुल्क ब्यवस्था गरिने संस्थाले जानकारी गराएको छ ।
