काठमाडौँ । नेपाल कम्युनिष्ट पार्टी (एकीकृत समाजवादी) ले दशौं राष्ट्रिय महाधिवेशन २०८० साल माघ १४ गतेदेखि १८ गतेसम्म आयोजना गर्ने निर्णय गरेको छ ।
एकीकृत समाजवादीको २०८० भाद्र ५–७ गते ललितपुर सम्पन्न केन्द्रीय कमिटीको छैठौँ बैठकले उपरोक्त निर्णय गरेको हाे ।
बैठकमा अध्यक्ष माधवकुमार नेपालको अध्यक्षतामा तथा महासचिव घनश्याम भूसालले सञ्चालन गर्नु भएको बैठकमा पार्टीका सम्मानित नेता झलनाथ खनालसहित १३१ केन्द्रीय कमिटी सदस्यहरुले आ–आफना धारणाहरू बैठक समक्ष राख्नु भएको जानकारी एकीकृत समाजवादीका घनश्याम भूसालले जारी गर्नु भएको प्रेस विज्ञप्तिमा उल्लेख छ ।
जारी प्रेस विज्ञप्तिका अनुसार
अध्यक्ष नेपालले बैठक समक्ष प्रस्तुत गर्नु भएको राजनीतिक तथा साङ्गठानिक प्रतिवेदन सुझावसहित सर्वसम्मतिले पारित भएको छ ।
नेकपा (एकीकृत समाजवादी)लाई मुलुकको नेतृत्व कारी कम्युनिष्ट पार्टी बनाउनु यो अवधिका लागि हाम्रो सबैभन्दा महत्वपूर्ण अभिभारा हो । देशभरी पार्टीको विस्तार गरी आगामी २०८३ सालको स्थानीय तहको निर्वाचनमा लड्ने र बहुसङ्ख्यक पालिकाहरुमा बहुमत ल्याउन सक्ने गरी पार्टीको निर्माण गरेरमात्रै त्यो अभिभारा पूरा गर्न सकिने छ र आगामी दिनमा हाम्रा सबै राजनीतिक र सांगठानिक प्रयासहरु त्यसकै लागि केन्द्रित हुनेछन् ।
आगामी असोजमा एक महिना नेकपा (एकीकृत समाजवादी) का मुद्दाहरु राष्ट्रलाई सुनाउने उद्देश्यका साथ मुलुकका रुपान्तरणकारी एजेण्डाका साथ मेची-महाकाली राष्ट्रिय अभियान आयोजना गरिने छ । सचिवालयले यसको विस्तृत योजना तयार गर्नेछ ।
ठूला सामाजिक तथा राजनीतिक पहलकदमीमा युवा समुदायको भूमिका सधैँ स्थापित छ ।
पार्टीमा युवा विद्यार्थीको सहभागिता बढाउने उद्देश्यले महाधिवेशन अगावै युवा विद्यार्थी लक्षित विशेष कार्यक्रम सञ्चालन गरिनेछ ।
कार्यक्षेत्रको विभाजन गर्दा सामान्यतः संघीय निर्वाचन क्षेत्रलाई आधार बनाएर केन्द्रीय कमिटीका सदस्यको जिम्मेवारी तोकिने छ ।
मंसीर मसान्तसम्म कमिटी नभएका पालिका र वडाहरुमा कमिटी गठन गर्नु र सबै कमिटीहरूले सदस्यताको वितरण गर्नु सङ्गठनका क्षेत्रको सबैभन्दा महत्वपूर्ण काम हुनेछ ।
सबै जन सङ्गठनले आगामी पार्टीको राष्ट्रिय महाधिवेशनलाई केन्द्रित गरी भदौ मसान्तसम्म सङ्गठन र प्रचारको योजना बनाएर कार्यान्वयन थाल्ने छन् ।
महाधिवेशनसम्म जाँदा केन्द्रीय कमिटी र निकायमा आवद्ध कमरेडहरूको कार्यक्षेत्रमा आवश्यक हेरफेर गर्न सचिवालयलाई जिम्मा दिइएको छ ।
विभिन्न समयमा पार्टीमा एकीकरण तथा समावेश भई आउँदा गरिएको समझदारी मुताबिक तथा आगामी कामको आवश्यकता र योग्यताको हिसाबले विभिन्न कमरेडहरूको जिम्मेवारीबारे निर्णय गर्नु पर्ने भएको छ । साथै, नेकपा एमालेबाट स्वतन्त्र रहनु भएकी कमरेड चन्द्रा श्रेष्ठले पार्टीमा समाहित हुन इच्छा जाहेर गर्नु भएको कुरालाई स्वागत गर्दै उहाँलाई उपयुक्त जिम्मेवारी दिनु पर्नेछ । यसको सबै जिम्मा केन्द्रीय सचिवालयलाई दिइएको छ ।
१५ दिन पनि कार्यक्षेत्रमा समय दिन नसक्ने कुनै पनि तहका कमिटीका अध्यक्ष र सचिवहरुलाई उक्त जिम्मेवारीबाट मुक्त हुनका लागि आग्रह गरिन्छ र त्यस्ता कमरेडहरुलाई अन्य जिम्मेवारी प्रदान गरी निर्णय कार्यान्वयन गरिने छ ।
कमरेड टीकाराम रिजालले उमेरका कारणले गर्दा केन्द्रीय कमिटीमा रहेर काम गर्न असमर्थ भएको जानकारी बैठकलाई गराउँदै आगामी दिनमा नयाँ पुस्तालाई प्रेरित गदै निरन्तर पार्टी र क्रान्तिको काममा रहने इच्छा जाहेर गर्नु भएको छ । कमरेड टीकाराम रिजालले पार्टीमा रहेर आजसम्म सक्रियतापूर्वक निर्वाह गर्नु भएको योगदान र जिम्मेवारी परिवर्तन गर्न देखाउनु भएको प्रष्टताको प्रसंशा गर्दै आगामी दिनमा पनि उहाँबाट यथाशक्य योगदानको अपेक्षा गर्छ ।
एमसीसी सम्झौताको कार्यान्वयको अनुगमन गर्न र पार्टीका तर्फबाट जनतालाई सुसूचित गर्न पार्टीले अनुगमन समिति बनाउने छ ।
पार्टी कामको आवश्यकता अनुसार पार्टीका विभिन्न तहमा केही कमरेडहरुलाई मनोनित गर्नु पर्ने भएमा मनोनयन गर्ने जिम्मेवारी पार्टी केन्द्रीय सचिवालयलाई दिइएको छ ।
