लोकसंवाद संवाददाता | लोकरञ्जन | असोज २९, २०८०
काठमाडौँ । डिल्लीराम अधिकारीको स्वरमा ‘खाडीको लाहुरे’ बोलको गीत भिडियोसहित नेपमेलो युट्युब च्यानल मार्फत सार्वजनिक भएको छ ।
भोजपुरको अरुण गाउँपालिका वडानम्बर–७ का पूर्व वडाअध्यक्ष तथा गत स्थानीय निर्वाचनमा गाउँपालिका अध्यक्षका उम्मेदवारसमेत रहेका अधिकारीले ‘खाडीको लाहुरे’ गीतमार्फत पहिलो पटक गायकका रुपमा डेब्यु गरेका हुन् । सानैदेखि गायनमा रुचि राख्ने अधिकारीले यस गीतमार्फत गायनमा राम्रो संभावना देखाएका छन् ।
समसामयिक सामाजिक विषयवस्तुमा आधारित देश नरेश अधिकारीको शब्द रचना र संगीत रहेको गीतमा योगेश काजीको संगीत संयोजन रहेको छ । भिडियोमा अर्जुन सापकोटा, जुना कार्की, रेखा अधिकारी र देशनरेश अधिकारीको अभिनय रहेको छ । भिडियोको निर्देशन मौसम हिमालीले गरेका हुन् भने छायांकन बुद्ध थापाको रहेको छ ।