अमेरिकामा शनिवार फेरि अर्को गोलीकाण्ड भएको छ । घटनामा परी पाँच जनाको मृत्यु भएको छ भने अरू २१ जना घाइते भएका छन् ।
देशको टेक्सास राज्यअन्तर्गत पर्ने ओडिसा नगरमा शनिवार दिउँसो एक बन्दुकधारीले हुलाक सेवाको ट्रक अपहरण गरी जथाभावी गोली चलाउँदै हिँडेको प्रहरीले जनाएको छ । घटनामा संलग्न श्वेतवर्णका झण्डै ३५ वर्षे बन्दुकधारीमाथि प्रहरीले चलाएको गोली लागी मृत्यु भएको थियो तर बन्दुकधारीको नाम भने प्रहरीले खुलाएको छैन ।
'टेक्सासको सार्वजनिक सुरक्षा विभाग नजिकै सुरक्षाकर्मीहरूले एउटा होण्डा कार रोक्न खोज्दा प्रहरीमाथि गोली चलाएर भागेको थियो । त्यसपछि त्यो व्यक्तिले हुलाक सेवाको ट्रक अपहरण गरेर बाटोमा मानिसलाई गोली चलाउँदै हिँडेको थियो', ओडिसाका प्रहरी प्रमुख मिचेल गर्कले पत्रकार सम्मेलनमा भन्नुभयो । आक्रमणकारीले जथाभावी गोली प्रहार गरेको प्रत्यक्षदर्शीहरूले पनि बताएका छन् । 'घटनापछि धेरै पीडित भएका छन्', गर्कले भन्नुभयो ।
घटनामा परी घाइते भएकामध्ये तीन जना सुरक्षाकर्मी रहेका छन् । राष्ट्रपति डोनाल्ड ट्रम्पले ट्विट गर्दै घटनामा बारेमा आफूलाई महान्यायाधिवक्ताले जानकारी गराउनुभएको उल्लेख गर्नुभएको छ । उहाँले सुरक्षाकर्मी र अनुसन्धानकर्ताहरूलाई पूर्ण रूपमा परिचालन गरिएको पनि बताउनुभयो । टेक्सासका गभर्नर जर्ज अब्बेटले एक वक्तव्य जारी गर्दै क्रूर र विवेकहीन घटनाबाट आफू र आफ्नी श्रीमती अत्यन्त दुःखित भएको उल्लेख गर्नुभएको छ ।
गत अगस्ट ३ मा टेक्सासको एल पासोमा भएको यस्तै गोलीकाण्डमा २२ जनाको मृत्यु भएको थियो ।
