नेपाली सेनाले शान्ति सेनामा सहभागी हुने सिपाहीलाई खाइपाई आएको भत्तामा प्रति महिना ८५ अमेरिकी डलर वृद्धि गर्ने निर्णय गरेको छ । प्रधानसेनापति पूर्णचन्द्र थापाको अध्यक्षतामा सोमबार बसेको सैनिक कल्याणकारी कोष सञ्चालन तथा व्यवस्थापन समितिको बैठकले बन्दोबस्ती कार्य गर्ने सिपाहीले हाल प्राप्त गरिरहेको एक हजार २९ अमेरिकी डलर भत्तामा ८५ डलर थप गरी प्रति महिना एक हजार ११४ अमेरिकी डलर कायम गर्ने निर्णय गरेको हो ।
बैठकले गणको नेतृत्व गर्ने गणपति प्रमुख सेनानीले प्राप्त गरिरहेको एक हजार ३७८ अमेरिकी डलर भत्तामा २१ डलर थप गरी एक हजार ३९९ अमेरिकी डलर प्रति महिना कायम गर्ने निर्णय गरेको छ । नेपाली सेनाका प्रवक्ता विज्ञानदेव पाण्डेका अनुसार वृद्धि गरिएको भत्तादर आगामी असोज १४ (अक्टुबर १)देखि लागू हुनेछ ।
अन्य मुलुकको प्रचलित अभ्यास एवं सैनिक ऐन, सैनिक कल्याणकारी नियमावलीको परिधिभित्र रही भत्ता पुनरावलोकन गर्ने सम्बन्धमा अध्ययन कार्यदल गठन गरी सकल दर्जाबाट प्राप्त राय सुझावका आधारमा सेनाले भत्ता वृद्धि गर्ने निर्णय गरेको उहाँले जानकारी दिनुभयो । उक्त भत्ता वृद्धिबाट सैनिक कल्याणकारी कोषलाई वार्षिक करिब ४६ करोड ३० लाख रुपैयाँ व्ययभार पर्नेछ । भत्तादर वृद्धिबाट तल्लो तहका सकल दर्जाको मनोबल बढ्ने नेपाली सेनाले विश्वास लिएको छ ।
संयुक्त राष्ट्रसङ्घको आह्वानमा नेपाली शान्ति सेनाले विश्वका ४३ वटा मिसनमा रही हालसम्म एक लाख २७ हजार ३९० जनाले शान्ति स्थापना कार्यमा योगदान पुर्याइसकेका छन् । उक्त क्रममा ६५ जना नेपाली शान्ति सैनिकले वीरगति प्राप्त गरेका छन् भने ६६ जना गम्भीर घाइते भएका छन् । हाल विश्वका ११ वटा द्वन्द्वग्रस्त मुलुकमा स्थापना भएका १२ मिसनमा १९५ महिलासहित पाँच हजार ९५ नेपाली शान्ति सैनिक खटिइरहेका छन् ।
शान्ति सैनिकमा योगदान गरेवापत संयुक्त राष्ट्र सङ्घबाट नेपाली सेनाले प्राप्त गर्ने रकमबाट २०३२ सालमा एक करोड २४ लाख रुपैयाँ रकमबाट प्रारम्भ गरिएको सैनिक कल्याणकारी कोषको कुल सम्पत्ति अहिले ४४ अर्ब रुपैयाँ बराबर पुगिसकेको छ । ठूलो सङ्ख्यामा शान्ति सैनिक खटाउने मुलुकको सूचीमा नेपाल अहिले पाँचौँ नम्बरमा छ ।
