अर्थमन्त्री डा. युवराज खतिवडाले ‘अहिले धितोपत्र बजारमा लगानी गर्ने उपयुक्त समय’ भएको टिप्पणी गरेलगत्तै लगातार ओरालो लाग्दै आएको धितोपत्र बजार आज एकाएक बढेको छ । कर्मचारी सञ्चय कोषको ५८औँ वार्षिकोत्सवका क्रममा मंगलवार अर्थमन्त्री खतिवडाले शेयर बजार घटिरहेको अहिलेको स्थितिमा नवप्रवेशीका लागि उपयुक्त समय रहेको धारणा राख्नुभएपछि बजार एक्कासि बढेको हो ।
बजार खुल्नेवित्तिकै आइतवार र सोमवारकै लयमा घट्न थालेको थियो । जब अर्थमन्त्रीको उक्त धारणा सार्वजनिक भयो, तब बजारले उकालोको यात्रा तय गर्यो । कारोबार सुरु भएको २८ मिनेटसम्म स्थिर रहेको बजार त्यसपछि भने एकाएक बढ्न थाल्यो । नेप्से परिसूचकको उकालो यात्रा अपराह्न १ बजेर २७ मिनेटसम्म निरन्तर रह्यो ।
नेपाल स्टक एक्सचेन्जका अनुसार आज शेयर कारोबार मापक नेप्से परिसूचक २६.९१ बिन्दुले बढेर एक हजार १५०.७४ मा पुगेर रोकिएको छ । प्रतिशतका आधारमा नेप्से २.३९ प्रतिशतले वृद्धि भएको छ । यस्तै, सेन्सेटिभ परिसूचक २.१२ प्रतिशत अर्थात ५.२२ बिन्दुले बढेर २५१.५७ मा पुगेको छ । नेप्से परिसूचक वृद्धिको तुलनामा कारोबार रकम भने बढ्न सकेन ।
आज कुल १७१ कम्पनीको १३ लाख ७७ हजार ९४६ कित्ता शेयर ३८ करोड ३९ लाख ५७ हजार ४२६ रुपैयाँमा खरिद बिक्री भए । स्टकका अनुसार कारोबार भएका कुल १२ उपसमूहमध्ये ११ उपसमूहको शेयर उकालो लागेको भने सामूहिक लगानी कोष भने घटेको छ । कोष ०.०४ प्रतिशतले घटेको छ । बैंकिङ २१.०७, व्यापार २.२८, होटल ५७.७९, विकास बैंक २६.७७, जलविद्युत् ३९.५, वित्त ८.४६, निर्जीवन बीमा ८८.५७, उत्पादन १०७.१, अन्य २०.२६, लघुवित्त ३०.२ र जीवन बीमा १०२.९३ अङ्कले बढ्यो ।
कारोबार रकमका आधारमा सिद्धार्थ बैंक शीर्ष स्थानमा रह्यो । सो बैंकको तीन करोड ४९ लाख ७७ हजार ३६० रुपैयाँमा शेयर खरिद बिक्री भयो । सो बैंकले आर्थिक वर्ष २०७५/०७६ को नाफाबाट २५.२६ प्रतिशत लाभांश दिने घोषणा गरेपछि लगानीकर्ता आकर्षित भएका हुन् ।
त्यस्तै, नेपाल बैंकको दुई करोड ९७ लाख एक हजार ६६९, नेपाल लाइफ इन्स्योरेन्स कम्पनी दुई करोड ८३ लाख ३८ हजार २०६, शिवम् सिमेन्ट एक करोड ९९ लाख ७६ हजार, प्रभु बैंक एक करोड ४५ लाख १९ हजार ८७८ र सानिमा बैंकको एक करोड २८ लाख ४० हजार ७०२ रुपैयाँमा खरिद बिक्री भयो ।
त्यस्तै, शिवम् सिमेन्टका लगानीकर्ताले ९.९० प्रतिशतले कमाउँदा गुराँस लघुवित्त वित्तीय संस्था ९.६२, राधी विद्युत् कम्पनी ९.४५, अपी पावर कम्पनी ९.१७, कर्णाली डेभलपमेन्ट बैंक ८.९१ र अरुण काबेली पावर लिमिटेडका शेयरधनीले ८.९१ प्रतिशतले कमाए । बढेको बजारमा एभरेष्ट इन्स्योरेन्सका लगानीकर्ताले ५.५९, आँखुखोला जलविद्युत् कम्पनी ५.३५, सिटिजन बैंक इन्टरनेसनल ५.०६, सिन्धु विकास बैंक ४.७६, सानिमा इक्विटी फण्ड ३.०३ र कालिका पावर कम्पनीका शेयरधनीले २.४३ प्रतिशतले गुमाए ।
