पटक पटकको प्राकृतिक प्रकोपबाट तहसनहस भई झण्डै छ वर्षदेखि बन्द रहेको निजी क्षेत्रबाट सञ्चालित ४५ मेगावाट क्षमताको माथिल्लो भोटेकोसी आयोजनाको पुनर्निर्माण कार्य अन्तिम चरणमा पुगेको छ । सिन्धुपाल्चोकको भोटेकोसी गाउँपालिकाअन्तर्गत तातोपानीमा बाँधस्थल र फुल्पिङकट्टीमा विद्युत् गृह रहेको सो आयोजनाको पुनर्निर्माणको कार्य हालसम्म ९० प्रतिशत सम्पन्न भई चाँडै नै विद्युत् उत्पादन गरिने आयोजनाका कार्यकारी अधिकृत विक्रम स्थापितले जानकारी दिनुभयो ।
हाल बाँधमा पानी भर्ने काम भइरहेको हुँदा तिहारअघि नै परीक्षण गरिने कार्यक्रम रहेकाले उत्पादित विद्युत् चाँडै नै राष्ट्रिय प्रसारण लाइनमा जोडिने कार्यकारी अधिकृत स्थापितको भनाइ छ । उक्त आयोजनाको पुनर्निर्माण कार्यका लागि दुई वर्षअघि सात अर्ब रुपैयाँमा चीनको सिनो हाइड्रो ब्युरो ११ सँग सन् २०१९ को अन्त्यसम्म सम्पन्न हुने गरी ठेक्का सम्झौता भएको थियो । गत असार २१ गते राती चाकुखोलामा आएको बाढीले प्रसारण लाइनका पाँचवटा टावरमा क्षति पुगेको थियो । हाल त्यसको मर्मत कार्य भइरहेकाले दशैँअघि नै सम्पन्न गरिने बताइएको छ ।
उक्त आयोजनालाई २०७१ साउन १७ गतेको जुरे पहिरोले प्रसारण लाइनका केही टावरमा क्षति पुगेपछि चार महिना बन्द भएको थियो । मर्मतपछि पुनः सञ्चालनमा आएलगत्तै २०७२ वैशाख १२ गतेको भूकम्पले क्षति पुर्याएपछि मर्मत कार्य हुँदै गर्दा २०७३ असार तेस्रो सातामा आएको भोटेकोसी बाढीले तहसनहस पारेपछि २०७४ सालमा पुनर्निर्माणको काम सुरु भएको हो ।
तातोपानीको १० किलोमा बाँध बाधेर ३.५ किलोमिटर सुरुङद्वारा फुल्पिङकट्टी झिर्पुस्थित विद्युत् गृहमा पानी खसालिएको थियो । भूकम्प र बाढीले सुरुङ मार्ग र विद्युत् गृहबाहेक बाँध, पेनस्टक पाइप, प्रसारण लाइनको केही टावर तथा त्यहाँ जडित सम्पूर्ण मेशिनरी सामान तथा उपकरणसमेतमा क्षति पुगेको आयोजनाले जनाएको छ ।
