लोकसंवाद संवाददाता | समाचार | असोज २२, २०७६
काठमाडौं । परराष्ट्र मन्त्रालयले चिनियाँ राष्ट्रपति सी जीनपिङको नेपाल भ्रमणको तालिका सार्वजनिक गरेको छ । मन्त्रालयले बुधबार सार्वजनिक गरेको भ्रमण तालिकाअनुसार राष्ट्रपति सी अक्टोबर १२ (असोज २५) गते काठमाडौं आउनुहुनेछ । उहाँको भ्रमण दुई दिने रहने भ्रमण तालिकामा उल्लेख छ।
चिनियाँ राष्ट्रपति अक्टोम्बर ११ मा भारतको चेन्नई पुगेर १२ मा काठमाडौं आइपुग्ने कार्यक्रम तय भएको हो । १३ अक्टोबर अर्थात् असोज २६ मा सी बेइजिङ फर्किने कार्यक्रम छ । सीको नेपाल भ्रमणको बेला नेपाल र चीनबीच केही परियोजनामा सम्झौता गर्ने कार्यक्रम छ ।
नेपाल भ्रमणको क्रममा चिनियाँ राष्ट्रपति सीले राष्ट्रपति विद्यादेवी भण्डारी, प्रधानमन्त्री केपी शर्मा ओली, नेकपाका अध्यक्ष पुष्पकमल दाहाल र प्रमुख प्रतिपक्षी दलका नेता शेरबहादुर देउवालगायतसँग भेटवार्ता गर्ने कार्यक्रम छ । चिनियाँ राष्ट्रपति सीलाई राष्ट्रपति विद्यादेवी भण्डारी र प्रधानमन्त्री केपी शर्मा ओलीले त्रिभुवन अन्तर्राष्ट्रिय विमानस्थलमा स्वागत गर्नुहुनेछ ।
