राष्ट्रिय सांस्कृतिक पहिचान र गौरव बोकेको नेपालीको महत्त्वपूर्ण चाड यमपञ्चक (तिहार)लाई अनुशासित, मर्यादित, सभ्य र मीतव्यायी रूपमा मनाउन गृह मन्त्रालयले सबैमा अनुरोध गरेको छ । वैमनश्य र तीक्तता त्यागेर आपसी सद्भाव, समन्वय तथा मित्रता अभिवृद्धि गरी चाड मनाउन अनुरोध गर्दै मन्त्रालयले विकृतिपूर्ण क्रियाकलाप भए, गरेमा कानुनअनुसार कारबाही गर्ने चेतावनी दिएको छ ।
मन्त्रालयले मंगलवार एक विज्ञप्ति जारी गर्दै स्थानीय प्रशासनबाट तोकिएको समयावधि र प्रक्रियाको परिपालना गरी देउसी भैलो कार्यक्रमलाई मनोरञ्जनात्मक रूपमा मात्र लिएर आयोजना गर्न आग्रह गर्दै कुनै अनुचित दबाबमूलक माग राखेर पत्राचार नगर्न भनेको छ । लागुपदार्थ निषेध र मदिरा नियन्त्रण अभियानलाई उच्च प्राथमिकतामा राखेर विविध कार्यक्रम सञ्चालनमा ल्याएको सन्दर्भमा त्यसको परिपालना गर्न आग्रह गर्दै मन्त्रालयका प्रवक्ता रामकृष्ण सुवेदीद्वारा आज जारी विज्ञप्तिमा भनिएको छ, 'नेपाली भाषा, धर्म संस्कृति र सभ्यतालाई विकृत तुल्याई समाजमा नकारात्मक असर पर्ने खालका गीत–सङ्गीत तथा श्रव्यदृश्य सामग्री उत्पादन, गायन, प्रसारण र बिक्री वितरण नगर्न, नगराउन अनुरोध गर्दछौँ ।'
यस्तो गतिविधि गरेमा प्रचलित कानुनअनुसार कारबाही गर्ने व्यवस्था गर्न मातहतका निकायलाई निर्देशन दिइएको मन्त्रालयले जनाएको छ । यमपञ्चक तिहारको समयमा यात्रुहरूको सहज आवागमनका लागि र सुपथ मूल्यमा गुणस्तरयुक्त खाद्यान्नको सहज उपलब्धता तथा शान्ति र सुव्यवस्था कायम गर्न गृह मन्त्रालयले मातहतका निकायलाई २४सै घण्टा परिचालन गरिएको जनाएको छ । जिल्लागत रूपमा चाडवाड केन्द्रित विशेष सुरक्षा योजना बनाई लागू गरिसकिएको भन्दै मन्त्रालयले उक्त कार्यमा यातायात व्यवसायी, सञ्चारकर्मीलगायत सबैले सामाजिक उत्तरादायित्वअन्तर्गत आआफ्नो तर्फबाट सेवा पुर्याउन आग्रह गरेको छ ।
प्रज्ज्वलनशील पदार्थ प्रयोग र उत्पादनमा कडाइ गृह मन्त्रालयले प्रज्ज्वलनशील पदार्थ प्रयोग, आयात तथा उत्पादनमा पूर्ण प्रतिबन्ध लगाएको जनाउँदै यस्ता गतिविधि गरे कारबाही हुने जनाएको छ । दीपावली मनाउने क्रममा भुइँचम्पा, पटाका, आतिसबाजी जस्ता विस्फोटक पदार्थको प्रयोगबाट सर्वसाधारण जनताको स्वास्थ्य र सुरक्षामा प्रतिकूल असर पर्ने, घाइते हुने र आगलागी भएर जनधनको क्षति हुने भएकाले त्यस्ता विस्फोटक र प्रज्ज्वलनशील पदार्थको उत्पादन, आयात, खरिद, बिक्री वितरण नगर्न र नगराउनसमेत मन्त्रालयले आग्रह गरेको छ ।
कसैले यस्तो गतिविधि गरेको पाइएमा कानुनबमोजिम कारबाही हुने मन्त्रालयद्वारा आज जारी विज्ञप्तिमा उल्लेख छ । कुनै गुनासो वा कानुनविपरीतको कार्य भएमा नजिकको सुरक्षा निकायमा खबर गर्न आग्रह गर्दै मन्त्रालयले अनुचित फाइदाका लागि हुने अवाञ्छित गतिविधिको निगरानी भइरहेको उल्लेख गरेको छ । ठगी गर्ने, कानुन मिच्ने, लागुऔषको प्रयोग, प्रतिबन्धित मदिराको अवैध बिक्री जस्ता गतिविधि गरेको पाइएमा कानुनअनुसार कारवाही हुनेसमेत मन्त्रालयले जनाएको छ ।
