लोकसंवाद संवाददाता | पर्यटन | मंसिर ०६, २०७६
चितवन । पृथ्वी राजमार्गअन्तर्गत चितवनको इच्छाकामना गाउँपालिकाको बजार क्षेत्रबाट निस्कने फोहरमैला प्रायः बजार नजिकै रहकाे राजमार्गको छेउबाट त्रिशूली नदी किनारमा जलाउने र फ्याँक्ने गरिँदा धुवाँका कारण दुर्गन्ध फैलिनुका साथै नदीसमेत फोहर हुन थालेकाे छ ।
इच्छाकामना गाउँपालिकाको मुख्य बजार क्षेत्र मुग्लिन, चेरेस, कुरिनटार र फिस्लिङमा दैनिक रुपमा अत्यधिक मात्रामा फोहर उत्पादन हुने गरेको छ । ती फोहर स्थानीय क्लब, समूह तथा टोल विकास संस्थाहरुले उठाएर बजार नजिकैको राजमार्ग छेउमा फालेर व्यवस्थापन गर्ने गरिएको छ । राजमार्गमा आउने धुँवाकोे मुस्लोले गर्दा प्रदूषण मात्र नभई सडक नै ढाक्दा दुर्घटनाको सम्भावना बढ्दै गएकाे छ ।
राजमार्गअन्तर्गत मुग्लिन बजार नजिकै र कुरिनटारको धारापानी नजिकै एकै दिनमा फालिएको फोहर जलिरहेको अवस्थामा फेला परेको थियो । गाउँपालिकाले अन्य विकल्प तयार नगरेसम्म फोहर व्यवस्थापनमा समस्या आइरहने स्थानीयवासीले बताउने गरेका छन् ।
सडक छेउमा फोहर जलाउँदा र फ्याँक्दा त्रिशूली नदीलाई समेत प्रदूषित बनाएको छ । नदी प्रदूषण हुँदा जलयात्रा व्यवसायसमेत सङ्कटमा परेको व्यवसायी बताउँछन् । जलयात्रा व्यवसायी कमल ठकुरीले नदी फोहर हुँदा विदेशी पर्यटकको सङ्ख्या हरेक वर्ष घट्दै गएको बताउनुभयो । व्यवसायी ठकुरीले भन्नुभयो, 'विदेशी पर्यटक फोहर देखेपछि जलयात्रा गर्दैनन्, त्रिशूली नदी किनारसँगै जोडिएको यस राजमार्गमा फोहर फ्याँक्दा र पोल्दा जलयात्रा सङ्कटमा परेको छ ।'
गाउँपालिकाले राजमार्गको बजार क्षेत्रमा उत्पादन हुने फोहरमैला व्यवस्थित गर्नकै लागि भनेर कुरिनटारको त्रिशूली नदी किनारमा फोहरमैला व्यवस्थापन केन्द्रको स्थापना गरेको छ । निर्माण गरेको डेढ वर्ष बितिसक्दा पनि उक्त केन्द्रको सञ्चालन अहिलेसम्म हुन सकेको छैन ।
गाउँपालिका अध्यक्ष गीताकुमारी गुरुङले भन्नुभयो, 'फोहरमैला व्यवस्थापन केन्द्र निर्माण गरिसकेका छौँ, अब हामी यसलाई चाँडै सञ्चालनमा ल्याउने छौँ, विविध प्राविधिक कारणले गर्दा सञ्चालनमा ढिलाइ भएको हो ।' केही प्राविधिक काम बाँकी रहेको र त्यो काम सकिएपछि केन्द्र तुरुन्तै सञ्चालनमा आउने अध्यक्ष गुरुङको दावी गर्नुभयाे ।