लोकसंवाद संवाददाता | समाज | असार २३, २०७७
काठमाडौं । मकवानपुर, मनहरी गाउँपालिका-७ बिजौनास्थित सडकमा बा.२१ च ६६४२ नम्बरको कारको ठक्करबाट पैदलयात्री हाल नाम, थर, वतन नखुलेका करिब ४५ वर्षीय पुरुषको सोमबार राति मृत्यु भएको छ । दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । कार र चालकलाई प्रहरीले नियन्त्रणमा लिएको छ ।
नुवाकोट, बिदुर नगरपालिका-५ गंगटेस्थित सडकमा बा.९८ प ५५१६ नम्बरको मोटरसाइकल अनियन्त्रित भई सोमबार राति सडकबाट करिब १० मिटर तल खसेर दुर्घटना हुँदा मोटरसाइकल चालक सोही नगरपालिका-३ बस्ने २१ वर्षीय ठाकुर अधिकारीको मृत्यु भएको छ । दुर्घटनामा गम्भीर घाइते भएका उनको उपचारको लागि चक्रदेव पोलिक्लिनिक बिदुरतर्फ लैजाने क्रममा बाटोमै मृत्यु भएको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको छ ।