लोकसंवाद संवाददाता | समाज | असार २६, २०७७
काठमाडौं । सुनसरी, बराहक्षेत्र नगरपालिका-११ मधुबन बस्ने २८ वर्षीय संजिब कुमार मेहेताको कोशीको पानीमा डुबेर बिहीबार बिहान मृत्यु भएको छ । २र३ जना साथीहरुसँग मिलेर सोही ठाउँस्थित कोशी किनारमा निगुरो टिप्न गएका उनी चिप्लेर लडेकाले साथीहरुको सहयोगमा पानीबाट निकाली उपचारको लागि बिराटनगरस्थित गोल्डेन अस्पताल लगेकोमा उपचारको मृत्यु भएको हो ।
बाजुरा, बुढीगंगा नगरपालिका-१ द्वारीस्थित बुढीगंगा नदी तर्ने क्रममा सोमबारदेखि डुबेर बेपत्ता भएका सोही नगरपालिका-२ बस्ने राम बहादुर थापाको छोरा १५ वर्षीय प्रताप थापा बिहीबार साँझ मृत अवस्थामा फेला परेका छन् ।
उनको खोजी गर्ने क्रममा घटनास्थलदेखि करिब २५ किमी टाढा अछाम साँफेबगर नगरपालिका-४ स्थित तारेकुना भन्ने स्थानमा नदीको किनारामा शव फेला परेको हो ।
सर्लाही, ईश्वरपुर नगरपालिका-८ मनहर्बा बस्ने रितिक राउतको छोरा २ वर्षीय अंश राउतको पानी बग्ने कुलोमा खेल्ने क्रममा डुबेर बिहीबार साँझ मृत्यु भएको छ । डुबेर घाइते भएका उनको सिद्दी बिनायक हेल्थ केयर केशरगंजतर्फ लैजाने क्रममा बाटोमै मृत्यु भएको हो ।
यस सम्बन्धमा स्थानीय प्रहरीले आवश्यक अनुसन्धान गरिरहेको छ ।