लोकसंवाद संवाददाता | अपराध | साउन ०४, २०७७
काठमाडौं । बारा महागढीमाई नगरपालिका-२ बरियापुरस्थित सडक किनारबाट नक्कली १५ लाख ४४ हजार ४ सय नेपाली रुपैयाँ र नक्कली १ लाख ८३ हजार ६ सय ५० भारतीय रुपैयाँ सहित ३ जनालाई शनिबार प्रहरीले पक्राउ गरेको छ ।
पक्राउ पर्नेहरुमा भारत मोतिहारी थाना मजौर पञ्चायत जमुनिया ग्राम कुरैया ठेगाना भएका २५ वर्षीय सुधिर कुमार कुशहवा, बारा सिम्रनगढ नगरपालिका(४ ठेगाना भएका २६ वर्षीय मनोज साह तेली र बारा आदर्श कोटवाल गाउँपालिका- ६ पटेर्वा ठेगाना भएका ३० वर्षीय नरेन्द्र प्रसाद कुशहवा रहेका छन् ।
उक्त स्थानमा अवैध लागूऔषध तथा नक्कली नोट कारोवार गर्दै छन् भन्ने विशेष सूचनाको आधारमा लागूऔषध नियन्त्रण ब्यूरो कोटेश्वरबाट खटिएको प्रहरीले सडक किनारमा ना.५४ प ३८०५ नम्बरको मोटरसाइकल सहित उनीहरुलाई फेला पारी शरीर तथा मोटरसाइकलमा रहेको प्लाष्टिकको वोरा खानतलासी गर्दा लुकाई छिपाई राखिएको अवस्थामा उक्त परिमाणको नक्कली रुपैयाँ बरामद भएको हो । उनीहरुको साथबाट नक्कली नेपाली रूपैयाँ १ हजार दरको १ हजार ४ सय ७० थान, १ सय दरको ७ सय ४४ थान तथा भारतीय नक्कली रुपैयाँ ५ सय दरको २ सय ९७ थान र र ५० दरको ७ सय ३ थान प्रहरीले बरामद गरेको हो ।
उनीहरुलाई बरामद नक्कली रुपैयाँ तथा ना।५४ प ३८०५ नम्बरको मोटरसाइकल समेत आवश्यक कानूनी कारवाहीको लागि जिल्ला प्रहरी कार्यालय बारामा बुझाइएको लागूऔषध नियन्त्रण ब्यूरो कोटेश्वरले जनाएको छ ।